|
Número 03 Marzo 2026 |
Novas convocatorias Clúster 3: Seguridade Civil para a sociedade
O vindeiro 16 de abril, na Sede da Autoridade Portuaria da Coruña, a Axencia Galega de Innovación organiza unha xornada de presentación das convocatorias en materia de seguridade encadradas no Cluster 3 do Programa Horizonte Europa (HE).
Estas convocatorias financiarán unha ampla variedade de actividades, que inclúen o desenvolvemento de solucións tecnolóxicas (xestión e tratamento de datos, ciberseguridade, robótica, infraestruturas dixitais, IoT, etc), loxísticas, enerxéticas (mobilidade, eficiencia) ou baseadas en drons, así como a posta en marcha de novas prácticas de comunicación, o deseño de materiais e infraestruturas (industriais e urbanas) ou o tratamento de residuos especiais. A aplicación destes desenvolvementos debe centrarse na seguridade civil, a resposta a desastres naturais, a mellora da convivencia social ou a loita contra o terrorismo e outras ameazas.
A xornada terá lugar en formato unicamente presencial e contará coa participación de Marina Martínez García, Punto Nacional de Contacto do CDTI para o Cluster 3 de HE. Durante a sesión tamén se presentarán os principais retos da seguridade en Galicia, así coma os topics do Programa de Traballo que sexan de maior interese para os participantes.
Ler máisConvocatorias
-
A Iniciativa Urbana Europea abre a súa 4ª convocatoria de Accións Innovadoras cun orzamento de 60 millóns de euros para as cidades
Está aberta a cuarta convocatoria de propostas EUI – Innovative Actions (EUI-IA), unha oportunidade estratéxica para que as cidades de máis de 25.000 habitantes experimenten con solucións audaces fronte a desafíos urbanos complexos. Cun orzamento provisional de 60 millóns de euros procedentes do FEDER, a convocatoria financiará proxectos en áreas críticas como a competitividade, a inclusión social, o cambio climático ou a dixitalización, ofrecendo un cofinanciamento de ata 2 millóns de euros por iniciativa. As entidades interesadas teñen de prazo ata o vindeiro 15 de xuño de 2026 ás 14:00 (CEST) para presentar as súas solicitudes de forma telemática.
Para afondar nos detalles destas oportunidades, a Axencia Galega de Innovación organiza o vindeiro 8 de abril o "Infoday de novas convocatorias Urbact e European Urban Initiative" do que podes atopar mais información na seguinte ligazón:
Infoday de novas convocatorias Urbact e European Urban Initiative
Máis información -
Nova oportunidade en Horizonte Europa: Asociación Europea para as Transformacións Sociais e a Resiliencia
A Comisión Europea anunciou a próxima apertura da convocatoria HORIZON-CL2-2026-02-TRANSFO-01, unha iniciativa dotada con 60 millóns de euros para fortalecer a resiliencia e a cohesión social ante os grandes retos actuais (cambio climático, dixitalización e cambios demográficos). Esta axuda, que se xestionará baixo un modelo de cofinanciamento, está dirixida a crear programas de investigación e innovación que modernicen a protección social, definan o futuro do traballo e garantan unha transición climática xusta. Para as pemes galegas, supón unha canle estratéxica para participar en proxectos transnacionais, acceder a financiamento en fervenza e colaborar con socios de toda Europa en solucións innovadoras con impacto social e económico.
- Data de apertura prevista: 12 de maio de 2026.
- Orzamento total: 60.000.000 €.
-
IA Xenerativa: Cara a un mercado cultural xusto e transparente
Esta convocatoria de Horizon Europe (HORIZON-CL2-2026-01-HERITAGE-04), dotada con 12 millóns de euros, busca proxectos que desenvolvan solucións tecnolóxicas e marcos legais para protexer os dereitos dos creadores fronte á IA xenerativa. O obxectivo é financiar o deseño de ferramentas de detección de contido manipulado, sistemas de trazabilidade para o adestramento de algoritmos e novos modelos de negocio que garantan unha remuneración equitativa e a transparencia en toda a cadea de valor das industrias culturais e creativas. A data de apertura é o 12 de maio de 2026.
Máis información
Eventos
-
Oportunidade de financiamento e colaboración en Agri-Tech: Aberto o matchmaking do proxecto GATE5.0
Data: Do 01/03/2026 ata 30/04/2026
Informamos do lanzamento do proceso de matchmaking de GATE5.0, unha iniciativa europea deseñada para impulsar a transformación dixital e sostible do sector agroalimentario. Este programa ofrece unha plataforma única para que pemes agroalimentarias con retos operativos e pemes tecnolóxicas (IA, IoT, robótica) conecten e co-deseñen proxectos de innovación. Os consorcios seleccionados poderán optar a unha axuda de ata 118.500 € para o desenvolvemento e validación das súas solucións. O prazo de inscrición e busca de socios na plataforma B2Match estará aberto ata o 30 de abril.
Ver detalles -
Participa na revisión dos ámbitos de priorización da Estratexia de Especialización Intelixente de Galicia
Data: Do 09/04/2026 ata 09/04/2026
Ante a evolución constante dos escenarios económico e tecnolóxico a nivel global, así como a gobernanza dinámica esixida pola Comisión Europea, iniciamos o proceso de revisión do perfil de especialización da Estratexia de Especialización Intelixente (RIS3) de Galicia 2021-2027. Para iso, convocamos o vindeiro 9 de abril unha serie de mesas de traballo participativas nas que poderás contribuír á revisión dos ámbitos de priorización da RIS3 2021-2027.
Ver detalles
Novas
-
A Xunta impulsará a I+G+i nas pequenas e medianas empresas a través dunha nova liña de axudas dotada con 3 M€
A Xunta de Galicia blinda o apoio ás pequenas e medianas empresas no seu desenvolvemento en materia de I+G+i a través do novo programa Ciencia-Empresa, dotado con 3 M€, que foi presentado hoxe polo conselleiro de Educación, Ciencia, Universidades e FP, Román Rodríguez, nun acto no que estivo acompañado pola directora da Axencia Galega de Innovación, Carmen Cotelo.
Ler máis
Busca de Socios
-
Intelixencia Artificial para blindar a resiliencia fronte aos ciberataques en Europa
Procúranse socios para conformar un consorcio internacional baixo o programa Horizonte Europa (Cluster 3). O proxecto céntrase no desenvolvemento dunha plataforma de formación en ciberseguridade impulsada por intelixencia artificial, deseñada para formar aos traballadores en ciberseguridade e protexer tanto a infraestruturas estratéxicas como a pemes. A iniciativa busca universidades, centros tecnolóxicos e empresas con experiencia en seguridade dixital e intelixencia artificial para validar metodoloxías en contornas reais e asegurar o cumprimento das novas normativas europeas.
Contactar -
Innovación en conxelación vibratoria para o sector premium
Procúranse socios tecnolóxicos e de investigación para o desenvolvemento conxunto dunha nova tecnoloxía de conxelación direccional vibratoria. O obxectivo é acadar procesos de cristalización optimizados para a produción de xeo de alta densidade e transparencia cristalina, eliminando as burbullas de aire. A colaboración céntrase no deseño de prototipos e na validación industrial de sistemas de refrixeración avanzados, con vistas a presentar candidaturas a programas europeos de financiamento de I+D.
Contactar -
Solucións naturais para a limpeza de augas: Procúranse expertos en biorremediación para Horizonte Europa
Procúranse empresas e actores do sector da auga interesados en participar nun consorcio internacional para unha proposta da convocatoria Horizonte Europa 2026. O proxecto busca desenvolver e validar tecnoloxías de biorremediación para eliminar contaminantes emerxentes (microplásticos, PFAS) en contornas acuáticas. As entidades participantes colaborarían na execución de probas en contornas controladas e na implementación de ferramentas de xestión de riscos a gran escala, contribuíndo á protección dos ecosistemas mariños e de auga doce.
Contactar -
Impulso á farmacoxenómica: Alianza europea para a formación en medicina personalizada
Procúranse socios para integrar un consorcio internacional que desenvolverá currículos educativos e microcredenciais no ámbito da farmacia xenómica. A iniciativa, enmarcada en Erasmus+, céntrase na creación de ferramentas de formación para profesionais sanitarios e técnicos de laboratorio, incluíndo o desenvolvemento de simuladores baseados en IA para a decisión clínica.
Contactar -
Pulseiras intelixentes e formación dixital: un paso adiante na seguridade do paciente
Procúranse socios para un consorcio internacional que lidera unha proposta Erasmus+ dirixida a transformar a seguridade clínica en Europa. A iniciativa céntrase no desenvolvemento de sistemas wearable (pulseiras QR) e módulos de formación avanzada para previr erros médicos en áreas corporais protexidas. O proxecto ofrece a oportunidade de colaborar no deseño de ferramentas de e-health e na creación de estándares educativos europeos para o sector sanitario.
Contactar -
Transformación de emisións industriais en químicos de valor: Oportunidade en Horizonte Europa
Procúranse socios industriais para participar nun proxecto de Horizonte Europa centrado na conversión de CO₂ procedente da industria do aceiro en ácido acético e hidróxeno renovable. A iniciativa utiliza nanoarquitecturas catalíticas e reactores de membrana para mellorar a eficiencia da economía circular. O perfil buscado inclúe produtores de aceiro, fabricantes de produtos químicos ou empresas de enxeñaría con capacidade para realizar análises tecno-económicas e plans de escalado industrial.
Contactar -
Ferramentas intelixentes para o cumprimento da nova Lei de IA Europea (AI Act)
Procúranse socios estratéxicos para o desenvolvemento dun toolkit modular que axude ás organizacións a cumprir cos requisitos técnicos e de supervisión humana da AI Act (Ley de IA Europea). O proxecto céntrase en sistemas de IA de alto risco e inclúe solucións para a mitigación de sesgos e a formación de operadores, buscando entidades interesadas en participar na súa validación e desenvolvemento técnico.
Contactar
Quedamos á vosa disposición para calquera dúbida sobre esta información, así como sobre os diferentes aspectos relacionados cos Programas Internacionais de I+D+i, no enderezo electrónico galactea.gain@xunta.gal e no teléfono 981 957 000.
Pode acceder a todos os Boletíns EEN difundidos a través desta ligazón.
Se non desexa recibir este boletín pode vostede darse de baixa enviando un mail a informa.gain@xunta.es
dende a conta na que desexe anular a suscripción.