Resólvese a fase de financiamento do programa Ignicia

Dos sete proxectos seleccionados, 3 están promovidos pola Universidade de Santiago de Compostela (RUCSC, relacionado con novos produtos antitumorais; FLUOROTOOLS, nova tecnoloxía de conxugación para o desenvolvemento de ferramentas fluorescentes, e inVerbis, software para a analítica de procesos de negocio); outros dous pola Universidade de Vigo (AIDFORK, relacionado coa análise forense de contidos multimedia e RADIOUAV, sistema para a medida de sensores de radiofrecuencia embarcados en drons); outro da Universidade da Coruña (INDEST, software para a selección automática de fotografías) e un da Fundación IDIS (NANOEVERS, solucións para medicina personalizada).

Cómpre destacar a excelencia científica dos proxectos financiados, nos que participan 48 investigadores das tres universidades galegas e da Fundación IDIS, estando un deles liderado por un investigador que conta cunha prestixiosa Advanced Grant do ERC (European Research Council), José Luis Mascareñas. Ademais, tres dos proxectos seleccionados participaran xa na edición anterior do Programa Ignicia e, tras implementar as melloras identificadas nos informes de avaliación, conseguiron finalmente resultar seleccionados nesta nova convocatoria do Programa.

A partir de agora, e durante un prazo de entre 18 e 24 meses, os proxectos recibirán un financiamento global de máis de 2,6 millóns de euros e contarán co apoio do equipo de xestión do Programa para a implementación do plan de desenvolvemento e comercialización, definido conxuntamente entre os equipos promotores, Oxentia e o equipo de xestión do Programa Ignicia durante a fase de maduración.

A incorporación destes sete proxectos (a partir dos que se prevé a creación de 5 spin-offs e o establecemento de 2 acordos de licenza para a transferencia de tecnoloxía), únese aos nove proxectos impulsados pola primeira convocatoria do Programa, reforzándose, deste modo, o compromiso da Xunta coa transferencia de coñecemento, o emprendemento innovador e a xeración de valor, emprego especializado e progreso económico e social a partir dos resultados de investigación.

Nesta nova convocatoria presentáronse un total de 48 proxectos promovidos por centros de coñecemento galegos. O proceso de selección tivo lugar en dúas fases, nas que participaron técnicos de GAIN e da Fundación Barrié, xunto con expertos internacionais de Oxentia (Universidade de Oxford), referente a nivel mundial no ámbito da transferencia de tecnoloxía. Na primeira fase do programa foron seleccionadas 25 propostas, que recibiron por este feito un informe sobre o estado e calidade da ciencia en termos de protección, propiedade e viabilidade económica e comercial. A segunda fase, que incluíu entrevistas cos equipos promotores, foi superada por 9 proxectos, dos que finalmente sete foron seleccionados para a fase de investimento.

Tes máis información sobre o Programa Ignicia na páxina de GAIN.

Se non desexa recibir este boletín pode vostede darse de baixa pinchando neste enlace ou enviando un mail a informa.gain@xunta.es dende a conta na que desexe anular a suscrición.