Convocatoria de proxectos de emprendemento no sector do mar

Baixo o paraugas do proxecto SHERPA DO MAR desenvolveuse un programa de apoio e acompañamento personalizado ao emprendedor que pretende contribuír a incrementar a probabilidade de supervivencia dos proxectos de emprendemento e intraemprendemento de base tecnolóxica no sector do mar. Na primeira semana de xullo abrirase unha convocatoria para seleccionar 12 proxectos de emprendemento. A convocatoria publicarase na páxina web do proxecto: http://www.sherpadomar.com e estará aberta ata mediados de setembro.

O seu obxectivo é mellorar significativamente a capacidade de xerar novos proxectos empresariais intensivos en coñecemento no ámbito do mar a través da colaboración entre diferentes axentes do sistema universitario, entidades dedicadas á I+D+i e entidades de promoción empresarial, en liña coa estratexia de apoio ao emprendemento innovador que a Axencia Galega de Innovación e a Consellería de Economía, Emprego e Industria están a levar a cabo a través da Rede de Aceleradoras e a plataforma StartIn Galicia.

Este programa porá a disposición dos 12 proxectos de emprendemento seleccionados:

• Un sistema de monitorización e avaliación personalizada. Realizarase un diagnóstico personalizado baseado en indicadores que avaliará as habilidades e competencias dos promotores e a calidade da idea de negocio presentada.
• Unha folla de ruta dinámica e personalizada. Deseñarase unha folla de ruta que conterá as accións recomendadas en cada fase do proceso emprendedor e en base ás súas necesidades identificadas no diagnóstico.
• Mentoría. Cada proxecto de emprendimento contará con asesoramento especializado en transferencia de tecnoloxía e coñecemento desenvolvido por persoas con ampla experiencia no apoio ao emprendemento.
• Recomendación de programas de apoio. Aos proxectos seleccionados recomendaránselles os programas de apoio ao emprendemento da Eurorrexión que mellor se adapten as súas necesidades
• Asesoramento científico-técnico de alto nivel. As principais universidades e centros de investigación da Eurorrexión ofrecerán asesoramento científico-técnico aos participantes para reforzar a base de coñecemento sobre a que se asenta a súa idea de negocio.
• Rede de contacto interrexional e difusión. O acceso a un marketplace web e a rede de axentes do proxecto Sherpa do Mar (principais axentes en ciencia e emprendemento da Eurorrexión) impulsará a visibilidade das ideas de negocio, así como o acceso a contactos e investidores a nivel interrexional.

Sherpa do Mar, Plataforma eurorrexional de fomento da competitividade no ámbito do mar a través do impulso de empresas de base tecnolóxica, é un proxecto integrado no Programa de cooperación transfronteiriza INTERREG V-A España-Portugal (POCTEP) 2014-2020, cofinanciado nun 75% por fondos FEDER.