Contratos predoutorais e axudas para grupos de referencia máis competitivos

O obxectivo do programa de contratos predoutorais é fomentar a formación do persoal investigador dende etapas iniciais. A convocatoria inclúe dúas modalidades. A modalidade A dirixida a potenciar as traxectorias de investigación vencelladas ás áreas estratéxicas definidas pola Estratexia de Especialización Intelixente de Galicia (RIS3), na que previsiblemente se apoiarán 57 contratos por importe de 23.500 euros anuais cada un.

A modalidade B, pola súa banda, cubre aquelas áreas de coñecemento que atopan máis dificultades de encaixe directo nos sectores produtivos. Deste xeito, garante un mínimo de 10 axudas no ámbito das Artes e Humanidades e outras 10 para Ciencias Sociais e Xurídicas, sempre que o número de solicitudes o permita. Prevese a contratación de 43 investigadores a través desta modalidade cun importe por contrato de 20.500 euros anuais.

Ambas modalidades inclúen estadías de tres meses de duración no estranxeiro cun importe mínimo, a maiores, de 6.000 euros, en función do destino.

O obxectivo desta liña de axudas é asegurar un financiamento estrutural e continuado, condicionado a criterios de calidade. Esta convocatoria contempla tamén dúas modalidades. A primeira está dirixida aos grupos de referencia competitiva, que se caracterizan por bos índices de publicacións científicas, un nivel de captación de recursos elevado e competitivos a nivel estatal e mesmo internacional. As axudas desta modalidade terán unha duración máxima de catro anos e a dotación total ascende a 7.120.000 euros.

A segunda modalidade está dirixida a grupos de potencial crecemento que, sen acadar os niveis de desenvolvemento dos anteriores, teñen calidade investigadora, constatable con criterios estritos e que están na senda que os leve a ser grupos de referencia. A duración das axudas será de tres anualidades e a dotación total desta modalidade ascende a 3.330.000 euros.

Podes atopar máis información sobre estas convocatorias, na páxina de GAIN.

Se non desexa recibir este boletín pode vostede darse de baixa pinchando neste enlace ou enviando un mail a informa.gain@xunta.es dende a conta na que desexe anular a suscrición.